لعبد الاله بنكيران رئيس الحكومة السابق شخصية مختلفة. قدرة تواصلية ما كتخلي حتى حد ما يكونش عندو موقف. سلبي ولا ايجابي. المهم كيكون التفاعل. هاد “الحيوان السياسي” كيتحرك بالفطرة. هادا سحرو عند المعجبين بيه وخطورتو عند معارضيه. دابا بعد حصولو على التقاعد الاستثنائي بحالو بحال اليوسفي مع فارق كبير فالشخصيتين. الاول =بنكيران= فرش كلشي وهو رئيس حكومة واخا جاي من حزب اسلامي ما عمرو قال راني اقسمت مع الملك على المصحف على شي حاجة والثاني =اليوسفي= غبر بزاف بزاف وحل فمو باش يهدر فبروكسيل ماشي فالمغرب. حتى كبر وعيى عاد بداو صحابو اللي طعنوه فالظهر باغيين يرجعوه. الغريب ان عدد من الصحافيين اللي كان رئيس الحكومة السابق بنكيران كيعطيهم ديما عنوانين. معاه الحياة السياسية محركة كيهاجموه ماشي ايديولوجيا بل على هاد التواصل. وهادا مهم للعمل الصحافي. مقابل الدفاع على هاداك ابو الهول اليوسفي اللي ما عمرو هدر ونهار هدر ما قال والو. المهم دابا المشكل فين كاين. ماشي فبنكيران. حقاش هاديك شخصيتو وموحالش يغيرها. المشكلة فخصومو اللي ولاو اليوم جوجت الانواع. صحابو فالحزب اللي كيمثل خطر على مصالحهم او على الحزب كيف كيبان ليهم والنوع الثاني خصومو وفيهم انواع كثيرة. كاينين المبدئيين وكاينين المسخرين. هادو كلهم باغيين بنكيران يسكت. الداودي والرباح باغيينو يسكت باش ما تمشيش الحكومة من العدالة والتنمية واخا هما عارفين باللي هاد الحكومة غادية تكمل ولايتها وخطأ كبير وهدية للاسلاميين هو تتغير فهاد الوقت. ما كنظنش شي عاقل فالدولة غادي يمس حكومة تالفة دايخة قايدها شخص بلا شخصية ما عارفش اش باغي. صحابو فالحزب باغيينو يسكت. ومعارضوه كلهم كينصحوه ولا كيآمروه يسكت. دابا واش هادو تلفو. كيفاش تطلب من مسؤول حزبي يسكت وفالوقت نفسه تجيب واحد بحال اليوسفي اللي كيسميوه ناس الحداثة “المجاهد”. اييه مشاو للمعجم الديني اللي كيتاهمو البي جي دي بيه٬ باش يجيبو هاد الاسم. شفتو التناقض كيف داير. ما علينا. باغيين هاد “المجاهد” اللي ما عمرو فحياتو جاهد الا فمنع صحف “لوجورنال” و”دومان”٬ يرجع وباغيين بنكيران يغبر. شي حاجة ما شاداش. النصيحة اللي ممكن تتوجه ليهم هي. ياك بنكيران انتهى وولى من الماضي والماضي فات كيف كتقولو. علاش مصدعين ريوسكم بيه. نساوه. ما تديوهاش فيه. ما تعلقوش عليه. ما تسوقوش ليه. يخطب مرة ولا جوج ولا عشرين٬ نخلوه. عطيوه النخال. حزبو كياكل العصا. عادي 8 سنين فالحكومة كتعيي بزاف. هادي كافية. راه ايلى ما داها فيه حد فشي خرجة ديالو. غادي يغبر. غادي يتنسى. غادي يولي من الماضي. وصافي. راه مع ردة فعل على خرجة ديالو غادية غير تحييه. اذن نساوه نساوه نساوه.
