امولا نوبة. بوبكدي دارت اخراج ل”زاكورة” نعمان لحلو

نعمان لحلو ناوي يغني على كاع المدن المغربية. من بعد المدينة القديمة وشفشاون وورزازات، طلق أغنية على مدينة زاكورة، سماها “يا الغزالة يا زاكورة”، وكتب الكلمات ديالها ولحنها، وشاركو الغناء فيها واحد الفنان صحراوي من المنطقة سميتو الشيخ لعكيدي ودار فيها جميع الألوان التراثية من الركبة والرسمة وأحواش وأقلال وكناوة وأحيدوس.
الأغنية دارت ليها الإخراج فاطمة بوبكدي، اللي عرفها الجمهور فمسلسلات تراثية فحال رمانة وبرطال وحديدان، ومثلات في الكليب ديالها الممثلة السمراء البوكوصة حنان زهدي. أما الإنتاج ديال الفيديو كليب، فتكلف بيه المجلس الإقليمي لزاكورة، اللي طلقها لبارح في الافتتاح ديال مهرجان الفيلم الدولي بالمدينة، بحضور الوالي والسلطات ديال زاكورة.