يخطب رئيس الدولة ولا ما يخطبش. ها شعار العنصر: بغيتو التجديد والشباب وسيرو قلبو عليه فشي حزب اخر راه الحركة ديالي وانا مولاها وخليكم من كلام الخطب الشي لاخر

كولشي عاقل على خطاب محمد السادس الأخير بمناسبة الذكرى ال 19 لعيد العرش. الملك محمد السادس كان طالب فيه بصريح العبارة الأحزاب السياسية باستقطاب نخب جديدة وتعبئة الشباب للانخراط في العمل السياسي. لكن سي العنصر ضرب هادشي عرض الحائط وممسوقش للخطاب الأخير كاع.
العنصر كان أعلن قبل أيام أنه مغاديش يترشح لهاد المنصب باش يترك المجال للشباب لكن هاد صباح دار مفاجئة من العيار الثقيل واعلن هاد الصباح فندوة صحفية عقدت على هامش الاستعدادات ديال مؤتمر السنبلة أنه غادي يترشح لسابق الأمانة العامة.
العنصر قيدوم الأمناء العامين واللّي عمّر اكثر من ربع قرن على راس الأمانة العامة ديال سبولة عندو دبا جوج باينين باغيين يدعموه.. فهاد الندوة الصحفية اللّي كانت اليوم أعلن محمد مبديع ومحمد أوزين دعم امحند العنصر للفوز بمنصب الأمين العام .
العنصر دار شعار خاص بيه. الحركة الشعبية هو مالها وما يمكنش يتخلى عليها. كيقول ما معناه : بغيتو التجديد والشباب وسيرو قلبو عليه فشي حزب اخر راه الحركة ديالي وانا مولاها وخليكم من كلام الخطب الشي لاخر