عداءة شابة ماتت بتسمم غدائي نواحي مكناس

ماتت شابة فعمر الزهور هاد الصباح ، بعدما عانات من ألم حاد فالبطن ، فمدينة “ويسلان” نواحي مكناس.
الهالكة الي من المرجح أنها كلات وجبة فاسدة، تسببات ليها فتسمم غدائي، من مواليد 1989، وكتسكن بحي “الرياض” بمدينة “ويسلان “، وهي عداءة بنادي الجيش الملكي ومعروفة فمدينتها.
سخفات بعدما رجعات من التداريب لي كتقوم بيها فمدينة مكناس، عبر حافلة للنقل العمومي، وكانت كتحس بمغص حاد فالأمعاء، ومباشرة بعدما هبطات من الطوبيس، فقدات الوعي .
وعلى إثره هزوها بإستعجال للمستعجلات، وبعدو تنقلات لمصحة خاصة بنفس المدينة، وبدل الطاقم ديال المصحة مجهودات باش ينقذ حياتها ،لكنها لفظات أخر أنفاسها.
الحادث غامض بزاف ، مع أنه من المرجح يكون تسمم غدائي أو أي تسمم أخر، وهادشي لي غادي يكتاشفو الطب الشرعي، بعد القيام بتشريح الجثة للوقوف على الأسباب الحقيقة للوفاة .