واش لقجع حاس براسو مبارك ومسعود على الكورة المغربية وكيفاش كيشوف هاد النتائج. ها اجوبة رئيس الجامعة ل"كود": كنحس براسي فرحان بحال كاع لمغاربة وممكن نديرو بزاف باش تستمر هاد الدينامية فالكورة والكعبي ممكن يولي هداف دولي كبير

فوزي لقجع رئيس الجامعة الملكية لكرة القدم مبارك ومسعود. من نهار وصل للجامعة والكورة المغربية كتميتامورفوزا. كاينة الدينامية كانينين النتائج وهاد الشي مبني ماشي غير عشوائي. فوزي لقجع عقلاني ما كيأمنش الا بالخدمة والتخطيط. "كود" سولاتو بعد تتويج المغرب بكأس افريقيا للاعبين المحليين.
فالاول سولاتو "كود" واش فرحان بهاد النتائج"؟ لقجع رد على "كود" باللي باش يكون حدث بحال "الشان" عرف نجاح كبير غادي يكون "فرحان بحال كاع لمغاربة". لقجع اضاف "مللي يكون عندك تشالنج ديال التنظيم فوقت قصير. من بعد كيجي الافتتاح ويمر مزيان ثم يحضر ليك فالافتتاح والاختتام ولي العهد مولاي الحسن راه تشريف"
لقجع اضاف ل"كود" ان هاد الشي ماشي صدفة بل داخل فواحد الدينامية كتعرفها كرة القدم المغربية. بدات مع فوز المغرب بالميدالية الذهبية فالالعاب الفرنكفونية وتبعها تأهل الوداد لنصف نهائي عصبة الابطال الافريقية ففوزها بعد ذلك بالعصبة هاد العام ثم جا هاد الفوز بالشان".
"كود" سولات لقجع واش مبارك ومسعود حقاش ماشي غير دا الشان بل هداف البطولة من بركان اللي كيرأسها رئيس الجامعة؟ رئيس الجامعة مرة اخرى بان متواضع وقال ل"كود" "كنحس براسي كندير خدمتي وحاس براسي مازال نقدر نديرو امور اخرى" ودعا "اللي عندو شي عرق وكيبغي هاد البلاد خاصو ينخرط فهاد الدينامية باش نحققو النتائج الايجابية"
بخصوص الهداف ديال البطولة الكعبي اللي من فرقتو اوضح لقجع ل"كود" "فرحت حقاش ولى عندنا هداف فالشان" ثم شرح ل"كود" باللي "بركان يالله خداتو غير فشتنبر اللي فات وباللي سبق ليه لعب مع الراك البيضاوي عام" ليخلص ان هاد اللعاب كيبين باللي كاين "البوطونسيال" عندنا. واضاف "ايلى بقي غادي فمستواه غادي يولي هداف دولي كبير والكورة المغربية هي اللي رابحة ماشي بركان او غيرها"