واش اخنوش بصاح هاجم البي جي دي فشي خطاب باش يرد عليه بنكيران؟ 9 تجمعات ديالو ما عمرو جبد حليفو وكيهدر على "صد الخطاب الانهزامي ومحاربة الشعبوية"

عبد الاله بنكيران رئيس الحكومة السابق قال ل"كود" في تبريره للهجوم على عزيز اخنوش وزيرو اللي كان عزيز عليه بزاف =رئيس التجمع الوطني للاحرار= بالرباط٬ باللي =اخنوش= بالغ وعيق فخطاباتو الاخيرة. واش بصاح عيق؟ دابا اخنوش فتجمعاتو ف9 جهات من اصل 12 =باقي ليه بني ملال تادلة والعيون بوجدور الساقية الحمراء وسوس ماسة درعة باكادير يوم 24 فبراير= اي فخطاباتو فتسع محطات ما عمرو جبد شي حزب سياسي ولا شي خصم سياسي ولا نطق باسم شي سياسي.
فهاد التجمعات كيفصل بتدرج البرنامج الحزبي للميادين الاكثر اهمية فتصور الحزب وهي الصحة والشغل والتعليم وكيخاطب كيف دار اليوم بباريس مع "شباب مغاربة ممثلين لمبادرة طارق بن زياد بفرنسا" على يوليو الشباب قوة اقتراحية وتشاركية وكيدعو لمغاربة للمشاركة فالعمل السياسي وكياكد انو باغي يدير السياسة بطريقة مختلفة وكيردد باللي "لا يمكن ترك المجال للشعبوية وغياب الفعل والعمل. بالإضافة إلى التأكيد على أهمية ولوج الكفاءات للعمل السياسي بشكل مكثف"
يعني ما عمرو جبد لا سعد ولا عبد الاله ولا غيرهم. راه كاين التسجيل ديال خطابات اخنوش كلها فيوتوب ونصوصهم فموقع الحزب. اييه كاين شي اعضاء بحال رشيد الطالبي العلمي مرة مرة كينتاقد ولكن هاد الشي كيبقى داخل فما يسميه الاسلاميون "التدافع السياسي"