شكون اللي فيه اللهطة انتي وزملاءك فالحزب اللي "خنتو" بنكيران ولا فقيرات قولبهم متخلف بدعم من السلطات وقتل فيهم 15 مرا. بسيمة تصطات: اللهطة سباب حادث سيدي بولعلام بالصويرة

هاد وزراء البي جي دي بالاضافة الى ان غالبيتهم ما فيديهش ولاو باش تقوواو فالحزب وباعو بنكيران عبد الاله الامين العام للحزب٬ غير كيخربقو. هاديك بسيمة الحقاوي وزيرة الأسرة والتضامن والتنمية الإجتماعية دارت تصريح غريب غبي حقير. قالت فيه اليوم الجمعة بمراكش خلال الندوة الجهوية لمحاربة العنف ضد النساء ، صباح اليوم الجمعة بمراكش٬ وفق ما نقلت "ايلاف المغرب" بان سبب حادث سيدي بولعلام اللي ماتت فيه 15 مرا "ربما اللهطة" او عدم النظام الذي لم تلتزم به النساء اللواتي كن ينتظرن دورهن لتسلم إعانات غذائية من بعض الجمعيات الخيرية.
الوزيرة زادت مبررة هاد التخربيقة ديالها مقدمة الوعظ للمغاربة انه حان الوقت لكي يلتزم المغاربة بالتحلي بالسلوك الراقي والإنضباط، مثل الدول المتقدمة. علاه الدول المتقدمة فيها وزيرة بحالك. التقدم راه كيكون قدوة من الفوق. سياسة مبنية على التربية على التعليم على العدل. شكون اللي ملهوط انتوما وزراء الحزب فالحكومة اللي تقلبتو 360 درجة غير باش تحافظو على مناصبكم ولا هاد لعيالات الفقيرات اللي ما قريتوهم ما علمتهم وساهمتو فتفقيرهم وباش بغى رئيسك السابق يعطيهم دعم درتو سيناريو وجريتو عليه. الله ينعل اللي ما يحشم. كاليك اللهطة.