بلدية جونيف مبغاتش تخلي الأسود العبو مع كوريا الجنوبية في مدينتها

رفضت بلدية جونيف بسويسرا باش تخلي المنتخب الوطني باش العب المباراة ديالو ضد المنتخب الكوري الجنوبي في الملعب ديال المدينة، وخافت من حدوث أحداث شغب أو أي انفلاتات لتقدر تأثر على الهدوء والاستقرار ديال المدينة.

القرار ديال البلدية صدم منظمي المباراة لضطروا باش اقلبوا على ملعب آخر فين اتلعب الماتش، خصوصا أن المنتخبين متافقين باش العبوا فسوسيرا، داكشي علاش نقلوا الماتش لبلدية بيين.

ورغم أن الملعب ديال بيين ماشي كبير وكيهز يالاه 6000 مشجع ولكن مع ذلك غادي العبوا فيه، خصوصا أنها غير مباراة ودية ومغاديش احضروا ليها جماهير بزاف، يالاه الجالية المغربية لغادي احضروا للماتش.

الأسود غادي اسافروا نهار الأحد لسويسرا بعدما العبوا الماتش ديالهم نهار السبت مع الغابون، برسم التصفيات ديال كأس العالم 2018 بروسيا، بملعب مركب محمد الخامس بالدار البيضاء.

وغادي تكون المباراة ديال كوريا الجنوبية آخر مباراة ودية للأسود قبل المباراة الرسمية والأخير في التصفيات لغادي العبوها ضد منتخب الكوت ديفوار.