شكون لي دار فضيحة إستدعاء منابر صحابو واللي كيكتبو عليه مزيان يحضرو فالريف؟. عبد الاله تهامي مدير مدير الاتصال فوزارة الاتصال هو صاحب لفضيحة

باش تعطي لواحد ماعارفش آش واقع فالريف يختار الاعلاميين لي غيمشيو يغطيو حضور اللجنة الوزارية مع إقصاء جميع المنابر الاخرى حتى من الإخبار ماشي من الدعوة، فراه كاين قصر النظر كبير فهادشي.
"كود" علمت أن مول لفضيحة ماشي وزارة الداخلية، وإنما وزارة الاتصال لي فيها وزير ضعيف مافاهم تا وزة فقطاع الاعلام، هادشي لي خلال عبد الاله تهامي مدير مديرية الاتصال فوزارة الاتصال يشد ملف إستدعاء الصحافيين لي غيرافقو الوفد الوزاري، السيد ناض مشا إستدعى غير الصحافيين لي كيكتبو عليه مزيان فجرائدهم، أما أي واحد مامسوقش ليه طحنو ومخبروش كاع، وهادشي طبعا مكيضرش تهامي وإنما كيضر الدولة كاملة لي باغيا تلقى حل للازمة، ويلا بقاو ناس بحال هاد تهامي كيدخلوا فحوايج كبار عليهوم بزاف هاد الدولة والله لا طفراتو ولا لقات شي حل لشي حراك.
وسائل الاعلام كتنقل وجهتي النظر و"كود" كيف كتنقل وجهات نظر الحراك كتنقل حتى محاولات الدولة لإيجاد حلول للازمة، و"كود" وغيرها من المنابر الاعلامية لي مخبروهاش مستعدة تتنقل على نفقتها مامحتاجاش شي حد يشد ليها الطيارة للحسيمة، ولكن الواجب هو الإخبار وتعطى هاد المسؤولية لناس مسؤولين ماشي لناس كيفكرو كيفاش يردو الجميل برهن الدولة فقضايا كبيرة.