انقلاب على شباط داخل اللجنة التنفيدية. تفاصيل حصرية تنشرها "كود" على محاكمة الأمين العام بحي شعبي بمراكش والاغلبية طالبات بإبعاد الكيحل وبنحمزة

دقة تابعة دقة فحميد شباط الأمين العام لحزب الاستقلال وماشي أعضاء اللجنة التنفيذية للحزب اللي حدو الباس. بل غرقوه.
فقد تحول اجتماع اللجنة التنفيدية للحزب بمقر الاستقلال عرصة لمعاش بمراكش هذا اليوم (مقر كان شراه علال الفاسي وهداه للحزب واليوم داروه بمناسبة رحيل مراكشي الحزب القيادي امحمد بوستة) الى محاكمة لشباط وناس الحي الشعبي وفق قيادي استقلالي ل"كود" سمعو صداع هاد الاجتماع اللي بدا مع الوحدة وسالى مع السبعة.
مصدر "كود" قال أن 15 عضو من اصل 19 حضرو الاجتماع اللي ما تعتاقدش منذ شهرين دخلو فحميد. "قلنا ليه كيفاش دير تصريح على موريتانيا ومع من تشاورتي باش مشيتي لفرانس 24 اللي كتسيرها المخابرات الجزائرية، وشكون اللي عطاك الإذن تعقد اجتماعات جهوية".
حسب مصدر "كود" طالب الأعضاء الغاضبون بتوقيف الناطق الرسمي عادل بنحمزة وحتى ابعاد عبد القادر الكيحل
قيادي استقلالي قال ل"كود" كولشي خاصو يتغير قبل المؤتمر. لا يعقل وحدين بحال الكيحل محكمين فالتنظيم وعندهم فجهة الرباط 130 عضو فالمجلس الوطني وما جابو والو فالانتخابات البلدية والتشريعية. العضوية فالمجلس الوطني فالجهات خاصها تكون بعدد المقاعد اللي جابوها فهاد الانتخابات" على هاد القبال حمدي ولد الرشيد غادي يولي عندو اكثر من خمسين بالمائة
حسب مصدر "كود" فحميد شباط تخلع وتفاجأ وبخصوص ترشيح نزار بركة او دعمه في الأمانة العامة قال مصدر "كود" "نساليو حريرة الأعضاء حسب الجهات فالمجلس الوطني أولا"