السخرية والتقشاب على الاتحاد الاشتراكي. اخر القفشات: دعاء الخاسر: يا ربي يكون خط المنتخب بحال حظ حزب لشكر يتأهل واخا خاسر

هاد الاسبوع كانت شوهة سياسية غادية تؤرخ لحكم الملك محمد السادس. كتب التاريخ غادية تذكر باش تتكلم على هاد الفترة ديال الحكم حزب ضعيف تالف حاكمو واحد الشخص اسمو ادريس لشكر. حزب باع تاريخو وتلات بيه الايام وولى كياكل فطابلات احزاب ادارية دارت النهار الاول باش تحد من تقدمو. هاد الشي كان فنهاية السبعينات.
لمغاربة اختارو التقشاب والتنكيت باش يجمعو بين الكورة وبين السياسة. بين حزب جاب غير الاعيان باش يوصل ل20 مقعد وفالاخير اختارو منو رئيس مجلس النواب. اخر النكات جات بعد فوز المنتخب المغربي لكرة القدم البارح امام الطوغو. نكتة فيها "يا ربي يكون حظ المنتخب الوطني بحال حظ الاتحاد الاشتراكي. يتآهل واخا خاسر".
نكتة كتلخص كلشي. كتبين فين وصل مستوى حزب مازال شي وحدين فيه مخرجين عينيهم. وهو نيت مدرسة هاد الاتحاد ديال لشكر. مدرسة اللي كتقري كل ما ناهضه الاتحاد فتاريخو. كتعلم الوضاعة اللي حاربها هاد الحزب. كتقوي ناس ناضل الحزب باش ما بيقاوش. ولى محمد زيان زعيم الحزب الليبرالي اكثر جرأة يقدم الدروس للاتحاد وهو على حق.