سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
حشومة وعيب خبار تهم القصر والملك وعلاقتو برئيس الحكومة تنشر فمجلة فرنسية وعامرة مغالطات: القصر الملكي مؤسسة كلشي لمغاربة مقربين منها وعندها ناطق رسمي بها : علاش دخلتو ساعة ام بنكيران وعلاش دخلتو البام وعلاش وعلاش
ما نشرته "جون افريك" عن توثر العلاقة بين الملك محمد السادس ورئيس الحكومة عبد الاله بنكيران في نسختها الالكترونية فضيحة، شوهة لينا كدولة عندها سيادة وعندها قدرة تحل مشاكلها بنفسها. المرة الاولى خرج لخبار ف"الاخبار" وكان كافي. كلشي فهم الرسالة. كان واضح لخبار. اليوم مع "جون افريك" كاين غموض وكاين نشر مشاكل داخلية فمجلة اجنبية. الحدث اللي خاصو يكون فهاد المجلة هي عودة المغرب للاتحاد الافريقي. ماشي هاد لخبار. مشكلة هاد لخبار انه قال "لاول مرة محمد السادس يترك تسريب غضبته على رئيس الحكومة. اللي يكرر ولاءه للملكية وفي نهاية الاسبوع يتحول الى معارض في لقاءات العدالة والتنمية". كيفاش هاد القضية ديال غاضب عليه. رئيس الحكومة كان صرح ل"كود" في هذا الاسبوع ان الملك الى كان عندو ليه شي عتاب او اي شيء يتصل بيه مباشرة. عادي بين رئيس الدولة ورئيس الحكومة يكون توتر احيانا ولكن يعالج داخليا على الاقل عند الاعلام المغربي كيف درتو مع الاخبار" ماشي عند "جون افريك". النقطة الاخرى المثيرة الغربية ديال الغضبة هو قول المجلة ان التصريحات الاخيرة لبنكيران عن وجود حكومة رسمية واخرى موازية ثم اثارته مرة اخرى لحزب الاصالة والمعاصرة وهجومه على حزب اسسه مستشار الملك ودعوته الى حله. هنا كاين مشكل كبير. البام حزب عندو اللي كيتكلم عليه. عندو اللي يدافع عليه. عندو اللي مأمن بيه. علاش تورطو المؤسسة الملكية فهاد لصراع. بنكيران كيدير السياسة وكيكول خاص البام يحل راسو براسو واصحاب البام كيديرو السياسة وكيكولو خاص نمنعو احزاب دينية وان ولاء البي جي دي ماشي للدولة الوطنية بل للدولة الامة وانها جزء من تنظيم الاخوان العالمي. مزيان خليوهم مضاربين ولكن النقطة الثالثة كتضحك بزاف بزاف. كاليك مصدر المجلة "صاحب الجلالة ما كيبغيش يكشف رئيس الحكومة على مضمون ما يدور بينهما وبصفة اقل يكشف على كل ما يقوم به من تصرفات خاصة في اشارة الى هدية من الملك محمد السادس الى ام بنكيران عبارة عن ساعة. الله اودي واش كتهدرو بنيتكم. ياك الملك هدا ساعة للوزير الاول الاسبق عبد الرحمان اليوسفي في عيد ميلاده وصوروها كاع وكلشي كتب عليها. يستحيل اليوسفي يسرب خبار بحال هادي. ثم ما خاصش الواحد يهدر على الحياة الخاصة. راه صور خاصة تنشر فصحفة ماشي رسمية ديال واحد اسمه البحري. هاد الخرجة ما موفقاش. ماشي اللي محتاجينها فالمغرب. كاين ناطق رسمي باسم القصر وكاين الصحافة المغربية. خبارنا نخرجوها حنا ماشي البراني وبالاخص الى كان هاد البراني هو "جون افريك" وكلشي عارف شكون هي وكيفاش كتمشى
