شكون عينو فالتراب وبوهمو. الاول حيدوه من الفوسفاط والثاني داروه فبلاصتو وعطاوه منصب اخر. مصدر من الفوسفاط ل"كود": التراب راهم حيدوه بزافت المرات ومقرب من بوهمو ل"كود": هادي غير اشاعات عينها فيه

ذكر موقع "افريكان انتلجنس"، نقلا عما وصفه ب"مصادره" ان المدير العام السابق للشركة الوطنية للاستثمار، يستعد لخلافة مصطفى التراب على راس المكتب الشريف للفوسفاط.
هاد لخبار فهاد التوقيت ماشي بريء٬ فحسب مصدر من المكتب الشريف للفوسفاط ل"كود" "مرة فالعام على الاقل كيطلقو هاد الاشاعة. وديما كتستهدف التراب". مصدر "كود" اضاف "الرئيس خدام وخارج المغرب وما ماديهاش فهاد الاشاعات حقاش ولف".
بخصوص بوهمو الباطرون السابق للشركة الوطنية للاستثمار "الهولدينك الملكي" واللي جرى عليه محمد منير الماجيدي مدير الكتابة الخاصة. كانو سمن على عسل وسالات بالضريب تحت الحزام٬ فان الامر مجرد اشاعة. مقرب من بوهمو قال ل"كود" "دابا السيد عندو البيزنس ديالو وخدام فيه" كما اضاف "يالله لاحو عليه اشاعة عضو مجلس ادارة "كازينو" باريس" ودابا ياخذ بلاصة التراب.
المصدر اكد ل"كود" "واش كاين شي واحد بعقلو غادي يصدق هاد الهدرة. واش منصب كبير وحساس ومهم بزاف بزاف بحال الرئيس المدير العام للفوسفاط غادي يخرج فالصحافة ونعرفو شكون اللي غادي وشكون للي جاي. هاد الناس ما عارفينش تقاليد التعيين عند المخزن. راه اللي غادي يتعين يقدر ما فراسو والو حتى يخبروه" يضيف المصدر ل"كود".