زيد الشحمة فظهر المعلوف. جوج وكالات ديال الدولة كيدعموا مهرجان بفلوس الشعب وممنوع الدخول لهاد المهرجان بلا ما تشري التذاكر!

وكالة تنمية الاقاليم الشرقية لي كترفض تدعم مجموعة من المبادرات والانشطة المتميزة، ووكالة تهيئة بحيرة مارتشيكا ميد لي كتكذب ديما وكاتقول أنها مكدعمش الانشطة، مدعمين نشاط خاص بصحاب لفلوس، واللي ماعندوا فلوس مايدخلش لهاد النشاط رغم أن هاد المهرجان لي هو "مهرجان الشرق للضحك" مدعم بفلوس دافعي الضرائب ولكن حرام عليهوم يدخلوا ليه واخا دعموه بفلوسهم.
مصادر خاصة قالت ل"كود"، أن منظمي هاد المهرجان لي غايديروه داخل منتجع أطاليون التابع لوكالة مارتشيكا، دايرين الدخلة بالتذاكر رغم أنهم جابوا دعم صحيح باش يديرو المهرجان كامل ومكمول ولكن هادشي ماخلاهومش يوقفو الطمع، وتضيف ذات المصادر أن الكارثة هي سكوت لمباركي الشاف ديال وكالة تنمية الاقاليم الشرقية على هاد لفضيحة رغم أن الوكالة ديالو من الداعمين الرسميين للنشاط، كما هو الحال بالنسبة لسعيد زارو لي هادي تقريبا 10 سنوات وهو على رأس الوكالة ومازال مادار حتى شي حاجة للمدينة من غير كورنيش واخا تخسرات فلوس صحيحة على هاد الوكالة.
المصادر نفسها أكدت أن وضع تذاكر لحضور أربع سهرات أثمنة تتراوح بين 100 درهم و 200 درهم يتم بعلم وكالة تنمية الاقاليم الشرقية ووكالة مارتشيكا اللتان تمولان المهرجان بمبالغ مالية ضخمة، في الوقت الذي كان على الوكالتان ان ترفضا دعم النشاط الموجه لطبقة معينة والذي لا يستفيد منه أبناء الشعب.