بنكيران عندو لقاء هاد النهار مع الرئيس المدير العام لوكالة "مارتشيكا ميد" الموكل إليها مهمة تأهيل بحيرة "مارتشيكا" لي جات فموقع يؤهلها أنها تكون من روائع البحيرات فالعالم وديكشي لي خلا محمد السادس يعطيها اهتمام كبير ويضخ فيها فلوس كبار باش ترجع منطقة سياحية لجلب سياح من كل أقطار العالم. وحسب ما علمت "كود" فإن الوكالة غادي تعطى ليها 800 مليار سنتيم باش دير مجموعة من المشاريع خاصها تكون واجدة سنة 2020، ومن هاد المشاريع واحدة من أكبر محميات الطيور النادرة فالعالم، والتي ترتاح في منطقة البحيرة خلال رحلتها نحو الشمال، بالاضافة إلى وحدات فندقية من صنف خمسة نجوم ومنتجعات سياحية من بينها منتج "أطاليون لي بدات فيه الخدمة هادي سنوات ومازال مابغاتش تكمل. دابا هاد المسؤولين لي غايجتامعو هاد النهار باش يوافقو على الحساب الاداري ديال الوكالة، ومشحال خسرات ديال لفلوس هاد العام وفاش خسراتهوم، وهي هاد العام يالاه دارت جزء من كورنيش المدينة ويالاه كملاتو بدات تقشرو من جديد أمام إستغراب المواطنين، حيث لم توضح الوكالة الاسباب التي جعلتها تدفع الملايير لتحديث كورنيش الناظور ثم إعادة إنشاءه مرة أخرى بمجرد إنتهاء الاشغال به. مصادر خاصة قالت ل"كود" أن لفلوس لي كانت كتستناهوم الوكالة مدخلوش باش تبدا فالمشاريع الصحيحة، لكن مصادر أخرى تؤكد أن هناك تخبطا في التسيير سيما أن الرئيس المدير العام ساكن فالطيارة وماكيجيش للناظور إلا نادرا رغم أنه مكلف بترؤس وكالة خاصها دير خدمتها وترجع الناظور قبلة سياحية عالمية وهادشي لي جعل الدولة ترصد 800 مليار لهاد المشروع.
