شي وحدين باقين كيعتاقدو باللي ايلى شكمتي قنصل راه مشى فيها. شي واحد عندو مشاكل كبيرة قولب بنعبد الله وشرفات وعمدة الرباط وحضرهم لليون باغي يشريها للقنصلة تماك

مازال شي عقليات مخزنية مقودة معشعشة فعقلية شي وحدين. هادا واحد السيد اسمو عبد اللطيف الصادقي كاليك منظم شي تخربيق. وزراءنا ما عندهم ما يدار مشاو حضرو ليه وباين تقولبو منهم نبيل بنعبد الله وشرفات افيلال. دابا كلشي باغي يركب على "كوب 22" وحتى هادا ركب عليها وكال هاد النشاط اللي حضروه حتى عمدة الرباط داخل فهاد الشي. المصيبة ان عمدة ليون ما حاشاهاش ليهم وما حضرش. باش النشاط ديال هاد خينا فشل ناض دار بيان كيكول اه القنصلة شفيقة الهبطي كتقاطع.
لنفرض جدلا السي الفاهيم قاطعات القنصلة وما حضراتش. اش علاقة هاد الشي بنجاح الحدث، ياك معاك الحكومة كاع علاش باغي تمسح فشلك فقنصل.
هاد السيد عندو مشاكل وقضايا فالمحاكم وكان عليه يسول علاش قاطع عمدة ليون الحدث وجاه عمدة صغيور والشوهة لكبيرة كيفاش قولبتي الحكومة وجات عندك وضيوف مغاربة رجعو نادمين على ديك المشاركة