لكل العشاق : عيدكم قريب وقائمة الهدايا تقترحها عليكم حكومة بنكيران‎

عيد الحاج فالنتين على الابواب، أربع وعشرين ساعة تفصلنا عنه، وللذين شاداهوم الحزقة، ومازال كيشوف شي تويشية ديال الشينوة باش يسكت بيها الساطة، جاءتكم الحكومة بالحل السحري، لا تنزعجوا ولا تفكروا كثيرا.
بالنسبة لأولئك الذين يوجدون في ذيل الترتيب الهرمي للعشاق لمرفحين، بالمعنى ديك لمكردين لي معندوش باش يدير الكادو، ما عليك إلا أن تطلب من الواليدة دير ليك واحد الكيلو ديال لملاوي بدل متعيط لواليدة تصيفط لعاقة.
طبعا ستتساءل سيدي العشيق، كيفاش نفهم الساطة بيلا هادا هو الكادوا الواعر، الحل عند الوزير محمد الوفا، لأن لملاوي وخبز الشعير أصبحوا من أهم الاغذية التي تحافظ على السلامة الصحية للحبيبة، بالاضافة إلى أن خبز الشعير مزيانة للريجم، والفورمة ماغاديش يوقع فيها شي مشكل يؤدي إلى غزارة الانتاج وسوء التوزيع في الشحوم، وبما أن الناس كولهوم شراو كادوا فيه ديكاشي ديال لعياقة نتا بغيتي تكون رومانسي وتعطي للساطة كادوا إستثنائي، لأنه أولا كيبين أنك مهتم بصحتها، وثانيا لأن الملاوي أصبحت أول أكلة مغربية تقليدية تدخل للبرلمان.
أما الفئة الثانية لي مرفحة شوية على خوتنا السابقين فيقترح عليكم بنكيران جوج ديال الهدايا، يا إما تشري بلغة ديال الشينوا، أو تشري براد، وأياه براد نعاماس، أولا البلغة منتوج تقليدي، وقول ليها راني عييت ندور في السوق وتشهيت نشوفك لابسة شي نهار البلغة وأنا نجيبها ليك، وزايدون بنكيران راه هضر لينا على البلغة، وخصنا حنا نكون في مستوى الوصية ونطلعوا المنتوج ديالنا أمام الغزو الشينوي، أما يلا كانت الساطة كتلبس البلغة من ديما، فيما عليك إلا تشري البراد والكلمة الوحيدة لي ممكن تسكت بيها الساطة هي تقول ليها، راني بديت كنفكر نجهزوا دارنا والبداية بالبراد ديال بنكيران.
بالنسبة للفئة الثالثة، نتوما حالكم صعيب شوية، حيت الاقتراح خايب وممكن تاكلوا فيه قتلة ديال لعصا، وخلاصة الاقتراح القادم من مجال الرياضة، هو أنكم تشريو شي لبسة خضرا ديال الشيخات وتعطيوها كادوا، وبالنسبة لهاد الاقتراح الصراحة معندوش شي تفسير المهم غير توكلوا على الله وديروها، وقولوا بأن اللباس عجبكم حيت بان في حفل الافتتاح ديال موندياليتو.
دابا نبداو ندخلوا في المعقول ونوصلوا للفئة لي مدورة الصرف شوية، يعني مرفحين من درجة أرفع، بالنسبة لكم أعزائي، أنتم ما عليكم إلا تشريو غير شي باكية دالشكلاط الرخيصة كاع، ولكن بشرط، تكون من نفس المحل لي تخاذ منو الشكلاط ديال عقيقة بنت الكروج، وطبعا غادي يكون الكادوا واعر، خاصة يلا قلتي ليها راني شريتوا ليك منين كيتقضى لوزير ديالنا، وتكون ديك الساعات نتا هو باها.
طبعا كانت هذه هي قائمة الهدايا المقترحة عليكم من طرف حكومة بنكيران، وكاتبها لا يتحمل أي مسؤولية أخلاقية أو جنائية تنتج عن تنفيذ الاقتراحات، لأن الملكية الفكرية تبقى لوزراء الحكومة الساهرين على تطوير الامة والتفكير في حلول إستعجالية لحل المشاكل العالقة، ومن بينها كابوس هدية الحاج فالنتين.