—- المخزن هو ديما الجهة الرابحة، ولي درويش بحالنا ديما كيبغي يكون مع الجهة الرابحة، لذا فمنذ مدة و أنا أهلل وأنادي وأطالب ببيع الماتش للمخزن، أنا متهوم متهوم والموشكيلة متهوم باطل، اللهم نديرو علاش بعدا، لذا فكل ما كانت كتجيني الفرصة كنعرض راسي للبيع، وماساومني حد، وبقيت كننقص الثمن لراسي غي بوحدي
درت على الراسي الصولد كاع، ومتسوقني حد، شوية وليت طالب فراسي غي باكية وينسطون وكاميلة و100 درهم ووالو، إلى أن جاء الفرج على يد الماجيدي. عمري تخايلت أن الميني أيباد ديال أحمد نجيم ومعاه حميد زيد وسقراط وإيسرافيل يقدرو يسواو نصف مليار، قلت زعمة راه نغلاو حتى نعياو مانفوتوش الف درهم
هادي هي كود لي يقدرو يحجزو عليها ويصادروها، وهادشي لي تقدر تجيب، إلى أن فاجأنا الماجيدي بإعلان قيمتنا الحقيقية فالسوق، أييه كنسواو 500 منيول، المنيول ينطح خوه. الصراحة كان خبر جد مفرح، لأنه وأخيرا ثم تقدير قيمتنا الحقيقية فسوق الأقلام المأجورة، و أصبحت لنا طريفة محددة، بالإضافة إلى أن الرائع فالأمر، والأكثر ابهاجا، هو أن تبرير رفع الدعوة هو فقدان الثقة الملكية في الماجدي من بعد قراءة ما كتب، وطبعا هذا خبر جد مفرح لأنه غادي يكون سيدنا كايقرا لينا، ويكون حتى هو تبع المذكرات ديالي حلقة بحلقة وتعرف على مجيريبة وعلى بومديان مول الصبيان…….
وهذا الحمد الله زاد حبب لينا سيدنا، لأنه مطلع بخبارنا، وغادي يكون عارف أنني واخا ساوي جزء من نصف مليار إلا أنني متخلصتش الشهر اللي فات، وغادي يكون سيدنا من خلال قراءته لكود مطلع على أخبار المغرب الحقيقية كما هي و على أخبار العالم من بني ملال حتى لعند كيم كرداشيان
قراءة سيدنا لكود كنظن إلا كانت حقيقية كما تعلل بيها الماجدي، فراه ماغاديش غي تخليه يفقد الثقة فهاد الأخير و إنما يفقد الثقة فشلا حاجات خريين حيث كود تنقل الواقع كما هو بلا زواق وبدون أي تحيز لأي جهة معينة. الماجيدي متعنا فمهرجان موازين الصراحة لي من أحسن الحاجات لي كتوقع فالمغرب خلال السنة، جابو كروبات مكناش كنحلموا نتفرجو فيهم مباشرة، وهاد العام جايبين فرقة بلاسيبو، لي من الفرق المفضلة عندي، وكنظن ربما على هادشي تحنسر وقال أرى نشوف هاد كود واش فيهم شي فلوس، الصراحة كون جات عليا من أجل احضار فرقة بلاسيبو يستاهل نصف مليار، ولكن كان يشوف عند شي موقع اخر يقدر يلقاها وهو عارف عندمن يقدر يمشي، أما موقع كود فراه واخا يكون الميني آيباد ديال أحمد نجيم هو لي تكتب فيه الوحي مايجيبش نصف مليار.
