المغاربة محيحين فأوروبا: حارث وأوناحي تأهلو لدومي فينال اليوروبا ليگ مع أمين عدلي وأكدو التألق المغربي لحكيمي ودياز ومزراوي فالشومبيونزليك

تأهلو المغربيين أمين حارث وعز الدين أوناحي مع أولمبيك مارسيليا الفرنسي لدومي فينال الأوروبا ليگ، بعدما ربحو بنفيكا البرتغالي بالبيلانتيات فربع النهائي.
أمين حارث وعز الدين أوناحي لعبو رسميين مع أولمبيك مارسيليا ضد بنفيكا الخميس فتيران الفيلودروم فمارسليا، وخرج أوناحي فالدقيقة 59، وبقى أمين حارث لاعب حتى الشوط الإضافي الثاني، حيث الفريقين مشاو لعبو الأشواط الإضافية بعدما تعادلو فمجموع الالي والروتور، حيث ربحو بنفيكا فالألي بجوج لواحد ومارسيليا ربحو فالرتور بنتيجة 1 لزيزو، وملي وصلت الدقيقة 110 خرج أمين حارث، ومشاو الفراقي بجوج لعبو البلانتيات ومارسيليا اللي ربحو بنتيجة 3 لجوج.
وبهاد النتيجة تأهلو أولمبيك مارسليا إلى دومي فينال الأوروبا ليگ، وغيلعبو ضد أتلانتا الإيطالي اللي قصاو ليفربول النگليزي من ربع النهائي، ودابا راه الكورة المغربية حاضرة فالمسابقة بثلاثي مغربي هما امين حارث وعز الدين اوناحي مع اولمبيك مارسليا الفرنسي وأمين عدلي مع باير ليفركوزن الالماني اللي قصاو ويستهام النگليزي والمدافع المغربي نايف أكرد وغيلعبو فالدومي فينال ضد روما الإيطالي، وهاد الحضور المغربي فالأوروبا ليگ راه سبقو تواجد الثلاثي المغربي أشرف حكيمي وابراهيم دياز ونصير مزراوي مع فراقيهم فدومي فينال شومبيونزليگ.