ما راجعش فكلمتو: مبابي قاليهم غايمشي بحالو من PSG واخا ربحو البارصا وتأهلو لدومي فينال شومبيونزليگ

أكد النجم الفرنسي كيليان مبابي أن الرباح اللي حقق مع باريس سان جرمان على البارصا فالصبليون البارح الثلاثاء، والتأهل معه إلى دومي فينال دوري أبطال أوروبا، ما عندو حتى شي تأثير على المستقبل ديالو.
وبعدما سالا الماتش بين باريس سان جرمان والبارصا، برباح كبير للفرنسيين بنتيجة 4 لواحد فربع نهائي دوري أبطال أوروبا، ماركا منهم كيليان مبابي 2 أهداف، وتأهلو لدومي فينال شومبيونزليگ، سولوه صحافيين اسبان واش هذا الشي عندو تأثير على قرارك والمستقبل ديالك (واش غتمشي من PSG)، وجاوب مبابي وقال: "لا، لا، لا".
وباغي كيليان مبابي يربح دوري أبطال أوروبا هذا الموسم باشي يخلي البصمة ديالو مع باريس سان جرمان الفرنسي، حيث هو آخر موسم له مع الفريق، وكلشي كيتسناه يمشي لريال مدريد الإسباني فالصيف الجاي.