فرنسا و PSG معولين على أشرف حكيمي باش يربحو البارصا ويتأهلو لدومي فينال شومبيونزليگ

معولين باريس سان جرمان الفرنسي بزاف على النجم المغربي أشرف حكيمي، باش يربحو البارصا غدا الثلاثاء فروتور ربع نهائي دوري أبطال أوروبا فالصبليون، ويتكاليفاو لدومي فينال شومبونزليگ.
ففرنسا والعاصمة ديالها باريس كلشي كيدوي على قمة ماتش الروتور بين باريس سان جرمان والبارصا، وجماهير الفريق الفرنسي كتهضر بزاف على رجوع النجم المغربي أشرف حكيمي للاليست ديال PSG، كثر ما كيدويو على نجوم آخرين بحال الفرنسي كيليان مبابي.
وكيشوفو بزاف من الفرنسيين بلي حضور حكيمي فماتش الروتور غيعطي إضافة قوية للفريق هجوميا باش يقدر يربحو البارصا، بعدما خسرو معهم فالألي فماتش غاب عليه السبع المغربي بسبب العقوبة ديال الاتحاد الأوروبي.
ومحتاجين باريس سان جرمان يربحو البارصا فالروتور غدا الثلاثاء فالصبليون بفارق 2 بيوتا، لتجاوز خسارة الألي بنتيجة 3 لجوج ففرنسا الاربعاء اللي فات، باش يتأهلو للدومي فينال ديال شومبيونزليگ، وراه شدو الطيارة قبل لحظات من صباح اليوم الاثنين من باريس لبرشلونة.