إنريكي مدرب PSG كونفوكا حكيمي فالسوبر الفرنسي بعدما خلاتو الجامعة يتعطل على معسكر الأسود

غيكون الدولي المغربي أشرف حكيمي حاضر رسميا مع باريس سان جرمان ضد تولوز فكأس السوبر الفرنسي، اليوم الأربعاء فتيران حديقة الأمراء فباريس، بعدما خلاتو الجامعة الملكية المغربية لكرة القدم يبقى.
وعلن الإسباني لويس انريكي مدرب باريس سان جرمان على لاليست ديال الفريق ضد تولوز بخصوص ماتش تولوز فالسوبر الفرنسي، وفيها 21 لاعب من بينهم النجم المغربي أشرف حكيمي، اللي من المنتظر يعتمد عليه المدرب المذكور كأساسيّ، حيث PSG طلبو جامعة الكورة باش يبقى يلعب معهم عاد يجي لمعسكر المنتخب المغربي.
وكشفت مصادر جامعية فوقت سابق لجريدة "كود"، أن اشرف حكيمي نجم باريس سان جرمان هو الاستثناء الوحيد فوسط لاعبين المنتخب المغربي، اللي خلاوه يبقى مع الفريق ديالو يلعب ماتشات الايام الأولى من يناير، بحكم أن مسؤولين النادي الفرنسي جد متعاونين فيما يخص المحترفين المغاربة فالفريق الفرنسي وكاينة علاقات مزيانة بين الجانبين، بالإضافة إلى أن أشرف حكيمي لاعب ماتش فينال.