كشف رضوان الفالحي المدرب المؤقت للوداد الرياضي على أسباب غياب لاعبين مهمين على الفريق ضد شباب السوالم فماتش سدس نهائي كأس العرش، واللي أثرت على الواك وكانت من أسباب الإقصاء ديال الفريق من المسابقة. وتكلم رضوان الفالحي بعد خسارة الوداد مع السوالم بنتيجة 1 لزيرو، وقال على غيابات الفريق فالماتش: "العملود، وجبران، وأوناجم، ولحتيمي، والهوني، وبوالفتح، كلهم موعتين وعندهم إصابات وماشي اختيارات فنية، وبالعكس راه حنا محتاجين للاعبين قادة فهاد المرحلة ونبغيوهم يكون معنا فالفريق". وكمل المدرب المؤقت للوداد: "الوضعية صعيبة على مستوى ليفيكتيف وكنتعاملو بالموجود سوا أنا أو إبراهيم النقاش وكنحاولو حتى مع اللاعبين اللي بعاد على التنافسية نوجدوهم وخاصنا نتعاملو مع هذا الظرفية وكنشكر اللاعبين على المستوى اللي قدمو اليوم وخلقو فرص، وخاصنا نتقلقو إذا ما خلقناش فرص وما كايناش الروح، ولكن اللاعبين راه كيجريو إلى آخر دقيقة باغيين يماركيو ويربحو واللي جاي احسن".
