الوداد ما قبلوش استقالة البنزرتي وما بغاوهش يمشي دابا

متشبتين الوداد الرياضي بالمدرب فوزي البنزرتي، اللي قدم الاستقالة ديالو البارح الاربعاء مباشرة بعد الخسارة مع شباب السوالم فالبطولة الاحترافية لكرة القدم، وما بغاوهش يمشي فهاد الظروف.
وحسب مصادر مطلعة، فإدارة الوداد الرياضي وحتى لدابا رافضين أنهم يقبلوا استقالة المدرب التونسي فوزي البنزرتي، وكاينة محاولات باش يخليوه يتراجع على هذا القرار ويقنعوه يستمر مع الفريق لمصلحة الواك، اللي كيدوز من مرحلة صعيبة ما فيهاش استقرار فالنتائج، مع العلم أن المدرب المذكور علن على الاستقالة البارح قدام وسائل الإعلام ملي سالا الماتش وودع اللاعبين فالفيستيير.
مسؤولين الوداد الرياضي كيشوفو أنه إذا مشى فوزي البنزرتي بحالو، صعيب يجي مدرب فاهم الفريق كيفما هو وأن المدرب التونسي فاهم مزيان الواك وشنو محتاج الفريق باش يخرج من أزمة النتائج ويستقر تقنيا.