عبر الدولي المغربي سفيان رحيمي على الفرحة ديالو حيث رجع المنتخب الوطني المغربي، اللي كاين معه دابا فمعسكر تدريبيي استعدادا لمواجهة كل من أنگولا وموريتانيا وديا، وأكد أن حمل توني المنتخب هو مسؤولية، حيث كيمثل دولة، وأنه غيدير اللي فجهدو على قبل ليكيب ناسيونال ويفرح المغاربة. وتحدث سفيان رحيمي فتصريح للموقع الرسمي للجامعة الملكية المغربية لكرة القدم وقال: "أي واحد كيتمنى يكون داخل هاد المجموعة الكبيرة ويتنادى عليه للمنتخب الوطني وهذا شرف ليا نكون عند حسن ظن الناخب الوطني والجمهور المغربي وأنا جد سعيد أنني هنا ونتمنى نقدم الإضافة". وكمل رحيمي: "الاستعدادات كتمر فأجواء جيدة وهاد المباريات اللي غنلعبو فيهم ضد أنگولا وموريتانيا هما ماتشات تحضيرية وفنفس الوقت خاصنا نوقفو على داكشي اللي كان ناقصنا فالمباريات اللي فاتت وفنفس الوقت نوجدو الماتشات الجايين ديال إقصائيات كاس العالم وكأس إفريقيا اللي غتنظم فالمغرب". وعن استقبال الأجواء فالمنتخب المغربي قال رحيمي: "اما بخصوص استقبال اللاعبين، فأنا ماشي شي واحد اللي غريب.. كنت غبت واحد المدة والحمد لله أنا دابا وسط هاد الگروب وكنتمنى نحافظ المركز ديالي هنا ونقدم الإضافة". وأكد ولد يوعري: "القميص الوطني كيفما كيعرف الجميع كتمثل من خلالو دولة على قدها وخاصك تكون على قد المسؤولية، ونتمنى نكون قد هاد المسؤولية ونفرحو الشعب المغربي، والجمهور ما يحتاج أننا نوجهو له رسالة حيث الجمهور المغربي هو عاشق لكرة القدم ونتمنى نفرحوه فأقرب وقت".
