علاش الخليجيين ماكايترمضنوش و يتشانقو فالزناقي ؟! حيت رمضان باش تصومو فخاطرك خاصك يا إيما تكون عايش فالصحرا تفيق وقتما بغيتي و تنعس فوق مابغيتي ماتابعك والو و لا يكونو عندك الفلوس موجودة و مامفروضش عليك تفيق مع النبوري تركب فالطوبيس باش تمشي للخدمة !

فالسبعينات كانت طاحت واحد الطيارة غادة من الاوروگواي للارجنتين و هازة فرقة ديال الريگبي، ماتو فيها بزاف ديال الناس من غير سطاشر واحد لي عاشو و هادوك السطاشر واحد لي عاشو بقاو شهراين بلا ماكلة بلا نعمة وسط الجبال و الثلج حتى لقاوهم فرق الانقاذ و لكن كيفاش غايعيش سطاشر واحد بلا ماكلة مدة شهراين ؟! الجواب هوا انهم بقوّة الجوع كلاو صحابهم ! كلاو خوتهم و صحابهم و الناس لي كانو معاهم فالطيارة ! باش تعرف شحال الجوع يقدر يوصّل الانسان لدرجة ديال البهيمية كاتختافي فيها الانسانية ديالو ! الجوع كايخربق الباراميطراج ديال بنادم ! الى كانت الكرش الشبعانة كاتقول للراس غنّي، الكرش الجيعانة راها كاتقول للراس شفر و قتل و خطف و دير اي حاجة باش نعيشو !
الترمضين ظاهرة معروفة فالمغرب! الناس بزاف كايضّاربو و يتشانقو و يتعايرو حيت بنادم كايكون جيعان و معصّب و مقطوع ! و شحال من واحد غايصوم هاد العام معانا فالسيفيل و العام الجاي غايلقاه هاز التشوبينة و شاد النوبة باش ياخد الحريرة د الحبس !
للأسف واخا الصيام حاجة مزيانة ( الصيام على الماكلة طبعا اما الصيام على الماء ماعمرو كان حاجة مزيانة من غير انه كايهلك الكلاوي) و لكن لنفرض الصيام تجربة روحانية زوينة و لكن شكون خلاك تعيشها ؟! الظروف لي كايتم فيها بالنسبة لواحد الغالبية ديال المغاربة ظروف مزرية، بنادم معصب و مقطوع و ساكن مع الجيران و كايعاني من غلاء الاسعار ... العيالات معصبات حيت غارقين فالماعن و الكوزينة و كايسلخو ولادهم فالزناقي، هادشي ماكايخليش ديك التجربة ديال الصيام تمر في ظروف زوينة و يستافد منها الانسان.
شوف واش الخليجيين كايترمضنو ؟! القطريين و لا الاماراتيين ؟! معلوم لا ! ماعمرك تلقى ابو حمد مشانق مع ابو فهد فبرج خليفة، حيت اولا الموجود موجود و اللعاقة داخلة ديما، ماكاينش المشاكل المادية لي كاتهلك اغلب الاسر المغربية و زيد على هادشي انه الاغلبية متفرغة للصيام، عيالات و رجال، الخدامات الفيليبيات مقابلين الكوزينة و الشيافر التقدية و الجو العام كايخلي الخليجي متفرغ للصيام ! كايدوز عندهم رمضان مفيك، سهرات و قصاير و جموع و صيام و ذكر ... هذا هوا رمضان !
رمضان كايدوز صعيب علينا حنا و فيه القطعة و المضاربات فالزناقي بنهار و البكا بالليل حيت بنادم كايعيى، كايتسهت، كايقتلو الجوع و النكد و كاتغلبو القفة د رمضان و الوقفة د الكوزينة هادشي ماكايخليش اغلب الناس تدوز تجربة روحية فريدة فرمضان زيد على ذلك انه المغربي كايخدم فالبني و فالخضرة و فالفلاحة و موظف فالمقاطعة و بوليسي خاصو يجري يشد شفار ماشي فحال القطري و لا الاماراتي لي ماكايمارسش هاد المهن الصعبة لي كاتطلب يقظة و جهد بدني مايمكنش يكون عندك لاكنتي جيعان و عطشان.
الحاصول لابغيتي تعيش تجربة رمضان كما ينبغي خاصك يا إيما تكون عايش فالصحرا فالقرن واحد بعد الهجرة فحال الصحابة رضي الله عنهم حر ديال راسك تفيق فوقما بغيتي و تنعس فوق ما بغيتي ماعندك وظيفة ماعندك باطرون ماغايسولك حد على المردودية ديالك! و لا تكون لاباس عليك لدرجة تخليك تتفرّغ للصيام و العبادة و بنادم خدام عليك يتسخر و يوجد و ينظف و الفلوس داخلة، ما عدى هادشي راه غانبداو نشكرو المباتة فالحبس.