توماس توخيل مدرب مزراوي غيمشي بحالو وبايرن ميونخ وليفربول باغيين تشابي ألونسو

قرر بايرن ميونخ الألماني يتفارق مع المدرب توماس توخيل، ولكن حتى يسالي هذا الموسم اللي مازال لاعبين فيه على دوري أبطال أوروبا وضعافت حظوظهم فالمنافسة على بطولة المانيا.
وقال توماس توخيل مدرب بايرن ميونخ اللي كيلعب فيه المغربي نصير مزراوي المصاب دابا: " اتفقنا على الفراق مع نهاية هذا الموسم، وحتى لهداك الوقت، غنكمل أنا وطاقم العمل ديالي الخدمة باش لتحقيق أقصى قدر من النجاح".
وديما مع أخبار بايرن ميونخ، وحسب الإعلامي الطالياني فابريسيو رومانو اللي متخصص فانتقالات اللاعبين والمدربين فأوروبا، فكل من بايرن ميونخ الألماني وليفربول النگليزي، حاطين العين على الإسباني تشابي ألونسو مدرب باير ليفركوزن الالماني متصدر البطولة الالمانية، وباغيين يديروه مدرب جديد مع نهاية هذا الموسم.
نفس المصدر وضح ان تشابي ألونسو مرشح بقوة لتعويض توماس توخيل فبايرن ميونخ او المدرب الالماني يوگن كلوب فليفربول، وانه ما كاينش شرط جزائي فالعقد ديالو باير ليفركوزن الالماني، وغيخليه الاخير يمشي بحالو إذا بغا يدير تجربة جديدة.