نايضة فبايرن ميونخ: مزراوي توعت ودايرين اجتماع لتقرير مصير توماس توخيل بعد الخسارة مع بوخوم

نايضة فبايرن ميونخ الألماني، بعدما خسرو مع بوخوم ضمن الدورة 22 من بطولة ألمانيا لكرة القدم، ولات بلاصة المدرب توماس توخيل فخطر.
وعرف الماتش بين بايرن ميونخ الألماني وبوخوم إصابة الدولي المغربي نصير مزواري اللي خرج فالدقيقة 28 في انتظار يخضع للفحوصات باش يعرفو شنو عندو، أمام نتيجة المباراة سالات ب3 لجوج لمصلحة بوخوم وخسارة بايرن ميونخ، وهذا الشي خلى الفريق يبعد على الصدارة ب8 النقاط، حيث المتصدر باير ليفركوزن ربح وعندو 58 نقطة، بايرن ميونخ عندهم 50 نقطة.
وحسب تقارير إعلامية أوروبية وألمانية ومباشرة ملي سالا الماتش بين بايرن ميونخ وبوخوم، فإدارة البايرن غيديرو اجتماع عاجل بسبب الوضع ديال الفريق خصوصا، وانه خسر 3 الماتشات متابعين مع ليفركوزن فالبطولة الألمانية الويكاند اللي فات ووسط السيمانة مع لازيو روما الطالياني فدوري ابطال اوروبا، واليوم مع بوخوم فالبطولة الالمانية، والمنصب ديال المدرب توماس توخيل فخطر حيث يقدرو يصيفطوه بحالو.