مزراوي ما تدربش مع بايرن ميونخ وها الحالة ديالو

من المنتظر يرجع الدولي المغربي نصير مزراوي اليوم الثلاثاء، لتداريب بايرن ميونخ الألماني استعدادا لمواجهة لازيو الطلياني فدوري أبطال أوروبا.
وقرر المدرب الألماني توماس توخيل يعطي يوم راحة زايدة لكل من نصير مزراوي والگول الألماني ديال بايرن ميونخ إيمانويل نوير، باش يرتاحو حيث بان عليهم العيا بعد ماتش ليفركوزن الويكاند الماضي، وما شاركوش فالحصة التدريبية ديال البارح الاثنين، حسب ما كشف عليه بايرن ميونخ.
وكيتعتير نصير مزراوي من العناصر آللي معولين عليها بايرن ميونخ، واللاعب دابا يالاه رجع من الإصابة اللي كانت مبعداه لمدة عن اللعب، وقدر يرجع يلعب ملي كان مع المنتخب المغربي فكوب دافريك، ودابا بدا كيرجع النيفو ديالو شويا بشويا، وراه دار ماتش مزيان حسب المتتبعين ضد ليفركوزن واخا البايرن خسرو الماتش بجوج لزيرو.