الرجاء ل "گود": راسلنا العصبة الاحترافية لتأجيل ماتش الحسنية وطالبنا بتكافؤ الفرص فالبرمجة وها علاش

بغاو الرجاء الرياضي تاجيل الماتش ديالهم ضد حسنية أكادير ضمن الدورة 20 من البطولة الاحترافية لكرة القدم، من غدا الثلاثاء حتى لبعدو الاربعاء.
وكشف مصدر من داخل الرجاء الرياضي ل "كود" ان النادي راسل العصبة الوطنية لكرة القدم الاحترافية، بخصوص الماتش ضد حسنية اكادير المبرمج غدا الثلاثاء فتيران برشيد مع 4 العصر، وطالبوهم التأجيل ديالو حتى الاربعاء، حيث صعيب على الفريق يلعب ماتش السبت وماتش الثلاثاء.
الرجاء الرياضي فالمراسلة ديالهم للعصبة الاحترافية طالبو باحترام تكافؤ الفرص بين جميع الفرق، وان التعامل يكون بحال بحال مع جميع الاندية فالبرمجة ديال الماتشات ديال البطولة الاحترافية، وان الرجاء ملي كان مشارك المواسم الماضية فالمسابقات الأفريقية كانت الأجندة ديال الفريق عامرة بالسفريات ومع ذلك كانوا كيتبرمجو له ماتشات البطولة وكيخرج يلعب المسابقات الأفريقية ويرجع يلعب ماتشات البطولة الاحترافية بمعدل 3 الماتشات فالسيمانة، ماتش فكل ويكاند وماتش وسط السمانة ما بين المسابقات الأفريقية والبطولة الاحترافية وكان كيلعبهم.