قصة صورة سيدنا اللي عجبات المغاربة بزاف.. حسيني المصمم اللي صوّبها فحوار مع "كود": الذكاء الاصطناعي كان حاضر باش نجيب كوستيم مكايناش ودرت اللمسة ديالي (صور)

أثارت صورة للملك محمد السادس، التي تم تداولها على نطاق واسع، منذ أمس الأحد، على مواقع التواصل الاجتماعي، إعجاب المغاربة بزاف لكن كاين اللي سحاب ليه أن الصورة جديدة وحديثة لسيدنا لكن "كود" جابت قصتها وكيفاش تصوبات.
مصمم كرافيك طه حسيني اللي صوب هاد الصورة الرائعة هضرات معاه "كود"، وأكد باللي من شحال هادي وهو كيحاول يبدع فصور سيدنا الملك محمد السادس ويحطهوم في أي مناسبة لكن الصورة الأخيرة قال باللي كانت فيها لمسة ديال شي حاجة مختلفة على باقي الصور.
وبخصوص كيفاش خدم هاد الصورة وأثارت إعجاب المغاربة بزاف، فقد أضاف طه اللي خدم مع بزاف ديال الفنانة بحال الدوزي وبدر سلطان وغيرهم، قائلاً: "خدمتها عن حب وخدمتها فالوقت اللي المغاربة كلهم محتاجين يشوفو الملك وكيتوحشوه".
"كود" رجعات سولات طه حسيني على كيفاش تصوبات هاد الصورة، وشرح هذا الأخير بالقول: "ضروري درت لمسة ديالي بحال الطاجين. كل واحد عندو النكهة ديالو وصعيب يكون الذوق بحال بحال".
وعاود المصمم تفاصيل هاد الصورة، موضحا ل"كود" أن الذكاء الاصطناعي كان حاضر فالعمل ديالو، وباللي كان خاصو يتعاون بشي حاجة أخرى، لكن أبدع من جهته بطبيعة الحال، لكن بالذكاء الاصطناعي خرّج كوستيم ديال سيدنا مكاينش كاع ومختلف تماما على أي كوستيم كاين وحتى اللي دخل لمحرك البحث كوكل مغاديش يلقاها نهائيا.
وفي ردّه على كيفاش تفاعل مع إعجاب المغاربة بصورة سيدنا. قال ل"كود": "والله العظيم كاينة فرحة وخلعة. أنا إنسان سلمي وبعيد على المشاكل.. كنبغي اندير واحد لخدمة كيفما كانت باش نخلي الابتسامة على وجوه الناس، وهادي هي أهم حاجة عندي".
رجعنا ف"كود" سولناه على شنو اللي خلاّه يخاف وهو دار عمل زوين بزاف وخلاّ المغاربة كلهم يتداولوا الصورة ديال سيدنا اللي صوبها، وقال أنه "كاين ناس في أي مجال غادي يقول علاش هذا دار صورة الملك"، قبل أن يخاطبهم بالقول: "أنا فخور وخاصني اندير شي حاجة ونتوما مدرتو والو".
يشار إلى أن المصور ومصمم الكرافيك طه حسيني هو إبن مدينة الريصاني مولاي علي الشريف بإقليم الرشيدية.