خاص الركراكي يخرج يكشف اسباب الإخفاق فكوب دافريك.. المغاربة باغيين يعرفو كيفاش اختار اللاعبين وعلاش عيط على وحدين ما قادرينش يلعبو وشكون وراهم

كيتسناو المغربة كاملين تفسير واضح للإخفاق الكبير ديال المنتخب المغربي فكاس افريقيا 2023، اللي منظماها الكوت الديفوار، وأسباب الإقصاء خصوصا وانها دابا كتعتبر اسباب تقنية المسؤول عليها هو الناخب الوطني وليد الركراكي.
المغاربة وبعدما دازو 3 ايام على الخسارة والإقصاء امام جنوب إفريقيا فثمن نهائي كوب دافريك، كيتسناو خروج الناخب الوطني وليد الركراكي فندوة صحافية، باش يكشف فيها وبصراحة على اسباب الإخفاق، خصوصا وانه تبين وبالواضح ان الاختيارات ديالو للاعبين والنهج التكتيكي ما كانش موفق وهذا الشي من الدور الاول وماشي غير فماتش الثمن مع جنوب إفريقيا.
الجماهير المغربية كتطالب دابا بمحاسبة وليد الركراكي، بعدما كانت او المهنئين له ملي حقق الانجاز التاريخيّ مع المنتخب المغربي فمونديال قطر، ودابا عدد كبير من المغاربة باغيين خروج إعلامي صريح للناخب الوطني وليد الركراكي فندوة صحافية يكشف من خلالها وبكل وضوح على اسباب الإخفاق فكوب دافريك فالكوت، وعلاش عيط على لاعبين ما واجدينش وفرشهم "الكان" بحال سفيان بوفال اللي ما قدرش يكمل المسابقة ونصير مزواري اللي موعت وما قادرش يلعب وسليم أملاح اللي ما عطاش داكشي اللي كان منتظر منو، فالوقت اللي كانوا لاعبين اخرين كان ممكن يكونو ربح للمنتخب المغربي فهاد البطولة خصوصا وانهم متألقين منذ اشهر مع الفرق ديالهم ومتعودين يلعبو فطقوس صعيبة بحال طقس الكوت الديفوار.
المغاربة ما كفاتهمش كلمات وليد الركراكي والمدرب المساعد رشيد بنحمود، وكيطالبو بأن الركراكي يخرج يتكلم على خلفيات الاختيارات ديالو والأسباب اللي خلاتو يعيط على كل لاعب من اللاعبين داهم معه لكوب دافريك، والخلفيات ديال هاد الاختيارات، لدرجة انه رجعت مرة اخرى الهضرة على السماسرة فالمنتخب المغربي وعلاقة وكلاء اللاعبين باختيارات الناخب الوطني، وبالضبط لاعب سابق اللي كايدير دابا اجون د اللاعبين، وعلاقته بالمحيط د المنتخب المغربي، وهاد كلها دابا هضرة كدور وسط الجماهير المغربية، وخاص الركراكي يخرج يدافع على راسو ويشرح على وكيفاش عيط على كل لاعب من ال 27 واحد اللي داهم للكوت ديفوار.
وهذا المطالب ديال الجماهير المغربية تجاه وليد الركراكي، ولات كتبان منطقية بزاف خصوصا وانه كيدرب منتخب ولا كيبان ثقيل بعد انجاز مونديال قطر اللي ساهم فيه هو براسو، وبالإضافة لهادشي راه المنتخب المغربي هو الوحيد من المنتخبات الأفريقية اللي فكوب دافريك توفرت له كل الإمكانيات من فندق خاص وتجهيزات تقنية وطبية وفريق طبي خاص واكل وشرب، وكلشي هذا الشي سهرت عليه الجامعة الملكية المغربية لكرة القدم برئاسة فوزي لقجع، باش المنتخب المغربي يكون مرتاح وعلى الاقل يوصل للمربع الذهبي.