اللي رسل مول القرد لاستراليا طلق اوديو كذوب. فيه باللي الحكومة غادية ترسل الصحافيين فطيارة ووو. شحتان ل"كود": ما كاينش هاد الشي الجمعية اللي غادية تكلف

اليوم الجمعة 5 يناير 2024 كان اجتماع فالرباط بين الجامعة الملكية المغربية لكرة القدم ووزارة الاتصال والجمعية المغربية للاعلام والناشرين. الموضوع المواكبة الاعلامية لكأس افريقيا للامم بالكوت ديفوار هاد الشهر.
قبل ما يخرج حتى بيان خرج مول فضيحة منح اعتماد لمول القرد فاستراليا واسمو عادل الرحموني ورسل للصحافيين اوديو ادعى فيه باللي الحكومة غادية تكلف بالصحافيين وتديهم فطيارة خاصة والاقامة والاكل تماك وحتى بلباس موحد. طبعا "كود" بحثات فهاد الادعاء. ادريس شحتان رئيس الجمعية المغربية للاعلام والناشرين اكد ل"كود" باللي هاد الشي كذوب.
شحتان اوضح ل"كود" باللي الجمعية هي اللي غادية تكلف بهاد الملف ديال تنقل الصحافيين الرياضيين من المغرب الى الكوت ديفوار ذهابا وايابا وحتى تنقلهم داخل هاد الدولة مع اقامتهم. تفاصيل هاد الشي غادي يكون فبيان رسمي وفق مصدر "كود".
دابا الجمعية المغربية للاعلام والناشرين همها لكبير يدير الصحافي المهني خدمتو فالكوت ديفوار وما يبقاش يتعاودو بحال فضيحة مول القرد ويتنقى بزاف هاد الميدان