عندو الزهر.. درون عتقات حولي كان غادي ياكلو واحد الذيب

انتاشر على مواقع "السوشيال ميديا" واحد الفيديو كيبيان كيفاش واحد "الدرون" عتقات حولي من بين السنان ديال واحد الذيب هجم عليه.
الدرون لي كانت كتطير فوق واحد القطيع ديال الحوالة لقات أن واحد الديب هجم عليهم، وفالوقت لي حكم فيه بسنانو الذيب شاف "الدرون" قربات منو وتخلع وهو يهرب.
هادشي وقع ف روسيا، لي ولاو فيها الفلاحين كبار كيستخدمو الدرونات باش يعاونوهوم ف المراقبة ديال القطيع ديالهم.
والمعروف دابا أن الدرون ولاو كيخدموها فبزاف ديال الحوايج، من غير الاستخدامات العسكرية، بحال الفلاحة وتوصيل الماكلة وغيرها من المهام المدنية.