المعنويات مرتفعة فالوداد قبل مواجهة سيمبا.. ها إمتى مسافرين لمراكش وها بروكرامهم قبل الماتش

غيدخلو الوداد الرياضي اليوم الخميس الكونسونطراسيو استعدادا لمواجهة فريق سيمبا التنزاني فدوري أبطال إفريقيا، فماتش غيتلعب السبت الجاي فمراكش.
وحط عادل رمزي مدرب الوداد الرياضي بروكرام الفريق استعدادا لمواجهة سيمبا التنزاني، وغيديرو الوداد الرياضي حصة تدريبية اليوم الخميس، وهي الأولى بعد ماتش البارح ضد مولودية وجدة فالبطولة.
وبعدما يتدربو الوداد هاد العشية فتيران بنجلون فكازا غيشدو الطرق مباشرة لمراكش، ويبداو يركزو على ماتش الفريق ضد سيمبا التنزاني، وقبل منو غيدير الفريق حصة تدريبة واحدة فملحق ملعب مراكش الكبير غتكون غدا الجمعة.
وبالنسبة للأجواء داخل الوداد الرياضي فالمعنويات مرتفعة بزاف وسط اللاعبين والطاقم التقني بقيادة المدرب عادل رمزي، بعد الرباح الكبير اللي حقق الفريق البارح على مولودية وجدة بنتيجة 3 لواحد فالبطولة، واللي خلا الفريق يوقف الخسران.
ودابا الوداد مركزين على الواجهة الأفريقية، وباغيين يعوضو الخسارة فالدورة الاولى والثانية من دور مجموعات دوري أبطال افريقيا، برباح السبت الجاي ضد سيمبا التنزاني فالجولة الثالثة، ويقربو من صدارة الكروب 2.