حياحة حولو عطية الله من مفاجأة زوينة فالمونديال إلى زرك وفرك وعايرو له والديه.. واش هذا هو جمهور الوداد الحقيقي؟

تحول الدولي المغربي يحيى عطية الله نجم الوداد الرياضي من مفاجأة واعرة وزوينة فمونديال 2022، إلى زرك وفرك وما كيعرفش يلعب.
وتعرض يحيى عطية الله لاعب الوداد الرياضي للسب والشتم من شي وحدين كانوا حاضرين فماتش الفريق ضد مولودية وجدة مساء الاربعاء فتيران البشير بالمحمدية، ضمن مؤجل الدورة 7 من البطولة الاحترافية.
واحد لاكليك ديال الحياحة محسوبة على جمهور الوداد الرياضي كانت فتيران البشير، وشبعت سبان فلاعبين الوداد، ولكن ركزت بزاف على يحيى عطية الله، واخا هو من اللاعبين اللي كان داير ماتش مزيان ضد مولودية وجدة.
هاد الحياحة ما خلاو غير اللي نساو فيحيى عطية الله من سب وشتم ومعيار، ووصفوه بالزرك والفرك وكاع أنواع المعيار اللي كيتوصف بها شي لاعب المستوى ديالو ضعيف، واخا هما كيبقاو جمهور وما عندهمش شي شوفة تقنية.
يحيى عطية الله ما استحملش السب والشتم اللي تعرض له، وملي ماركا هدف التعادل للوداد الرياضي توجه جيهت هادوك الحياحة ودار صبعو على فمو زعما قالهم اللقوا راني سكتكم، ولكن مباشرة بعدها توجه لفئة من الجمهور اللي كان كيشجع الفريق هو يقولهم سمحو ليا وراكم على راسي.
مقربين من يحيى عطية الله لاعب الوداد الرياضي، كشفو لموقع "كود" أن اللاعب تفاجأ بالسب من طرف هادوك الحياحة، وحاول ما أمكن ما يتسوقش لهم، ولكن هما بقاو كينبرو عليه وكل مرة يعيروه سوى شد الكورة أو طلقها، وبقى فيه الحال حيث عايرو له الأب ديالو المتوفي، وهذا الشي اللي كيعكيس رد الفعل ديالو ملي قالهم سكتو بيديه.
ومعروف يحيى عطية الله مول 28 عام، بالأخلاق ديالو فالتيران وبرا التيران، وأنه لاعب عندو الروح الرياضية وما كيدخلش فالحزازات بين الجماهير، وهذا الشي إلى جانب مستواه والقتالية ديالو فالوداد وهذا الشي اللي خلاه يكون فالمنتخب المغربي.