الويكلو كيقتل الكورة.. غياب الجمهور على ماتش الوداد والسوالم باين ومؤثر واستنفار أمني فدونور

غيلعب الوداد الرياضي الماتش ديالو اليوم الخميس مع شباب السوالم برسم الدورة 3 من البطولة الاحترافية بلا جمهور، بسبب عقوبة من العصبة الاحترافية لكرة القدم على الفريق الاحمر.
والماتش بين الوداد والسوالم غيدخلو الفريق الاحمر فتيران مركب محمد الخامس بالدار البيضاء بلا جمهور، فأول ويكلو للواك هذا الموسم، وهذا العقوبة نزلت على الفريق بسبب "مقدوفات" استعملتها الجماهير الودادية فالماتش الماضي مع شباب المحمدية فتيران البشير برسم الدورة 2.
الويكلو كينقص بزاف من جمال كرة القدم، وهذا الشي اللي غيكون مصيرو ماتش الوداد والسوالم من غير اذا كان شي نيفو مزيان من لاعبين الفريقين وشي أهداف، وراه الاجواء ناقصة قبل انطلاق المباراة، حسب ما عاين موقع "كود" بالمحيط ديال التيران حيث البيبليك ما كاينش.
الشوارع ديال الدار البيضاء والزناقي ديال المعاريف اللي قريبة للتيران خاوية وفيها غير الناس عاديين كيدوزو، بحالا ما كاينش ماتش ديال الكرة وريحة المباراة ما ماكايناش، وهذا الشي قبل تقريبا ساعتين على الماتش اللي غيبدا مع 8 الليل، وهذا الشي على عكس الايام اللي كيكون فيها الجمهور سوا ملي كيكونو الوداد لاعبين او الرجاء، حيث كازا كتكون فيها الحيحة وأجواء استثنائية نهار الماتش الجماهير كتدير الفرجة قبل ما تبدا المباراة، وهذا الشي اللي كيميز كرة كازا على باقي مدن الفرق الاخرى.
وكتعرف المباراة بين الوداد الرياضي وشباب السوالم واخا ملعوبة بلا جمهور، (كتعرف) استنفار أمني بمحيط ملعب المركب الرياضي محمد الخامس والشوارع اللي كتدي له، وتواجد للباراجان ديال البوليس والقوات المساعدة، اللي خدامين على تأمين التيران باش يدوز الماتش فأحسن الظروف، واخا ما كاينش الجمهور ولكن التواجد ديالهم مهم وتحسبا لأي طارئ.