المشاكل بين رمزي واللاعبين ولاو باينين.. المدرب مشى بوحدو من المطار وعكس العادة ما ركبش كار النادي

كيبان أن المشاكل داخل الوداد الرياضي كبرات بزاف ما بين المدرب عادل رمزي واللاعبين، وهذا الشي بعدما خسر الفريق الماتش ديالو الرابع على التوالي بهزيمة البارح السبت مع أسيك ميموزا الإيفواري، ضمن دوري أبطال إفريقيا.
عادل رمزي والمساعد ديالو ملي وصلو الوداد الرياضي للمغرب جايين من تنزاتيا اليوم الاحد فالعشية، وحسب صور توصل بها موقع "كود"، مشاو بجوج بوحدهم من مطار محمد الخامس، وهذا الشي عكس ما تعودو عليه، حيث موالفين كيمشيو مع اللاعبين فالكار حتى لتيران بنجلون وكيخدو طوموبيلاتهم.
عادل رمزي والمساعد ديالو ماشي غير هما اللي مشاو بوحدهم من المطار، ولكن كاينين عناصر اخرى بحال اللاعب الجزائري زكرياء دوراوي اللي جات واحد الطوموبيل داتو، فالوقت اللي باقي اللاعبين بمن فيهم الكابيتان يحيى جبران مشاو فالكار د الواك حتى لتيران بنجلون وخداو طموبيلاتهم.
تصرفات المدرب عادل رمزي واللاعبين كتبين أن المشكل كبير داخل الفريق ما بين المدرب واللاعبين، وأنه بالفعل كاين شي خلل وتقدر حتى الثقة تكون ما بقاتش ما بينو بين الكروب، وهذا صبح كيخصو تدخل عاجل من إدارة النادي برئاسة سعيد الناصيري، اللي من المنتظر يجلس مع رمزي والركائز ديال الفريق باش يلقى حل للوضع الحالي.