لاعب مهم رجع كيتدرب مع الوداد وكيوجد لماتش الزمامرة

استرجع الوداد الرياضي اللاعب ديالو منتصر الحتيمي، وقدر يكون مع الفريق فالتداريب حيث الاصابة اللي جاتو فالماتش ضد هافيا الغيني السبت الماضي ما كانتش خطيرة.
وقدر يشارك منتصر الحتيمي فتداريب الوداد الرياضي استعدادا لمواجهة نهضة الزمامرة، هذا الشي بعدما دار الفحوصات الطبية اللازمة، وتبين انه بخير وكيتدرب مع الكروب.
وكان منتصر الحتيمي خرج من ماتش الوداد الرياضي وهافيا كوناكري الغيني موعت، وكان كيبان مقصح من خلال طريقة المشي ديالو، وحتى المدرب عادل رمزي كان قال ان اللاعب توعت فالقدام د رجليه.
وكيواصل الوداد الرياضي بقيادة المدرب عادل رمزي التحضيرات ديالو لماتش نهضة الزمامرة اللي غيتلعب غدا الأربعاء فستاد دونور، واللاعبين كاملين كاينين مع الفريق باستثناء زهير المترجي اللي مبعدو المدرب، واليوم غيديرو الواك آخر حصة تدريبية وغيدخلو كونسوطراسيون بفندق فكازا استعدادا للماتش.