الوداد فبريطوريا: عادل رمزي والطاقم ديالو حيدو عيا السفر من اللاعبين والكروب ناشط ومركز على الفينال

بداو الوداد الرياضي كيولفو الأجواء اللي كتسبق إياب فينال السوبر ليك اللي غيلعبوه الويكاند الجاي فجنوب إفريقيا، ضد فريق ما ميلودي صن داونز الجنوب إفريقي.
الوداد اللي وصلو ظهر اليوم الخميس إلى جنوب إفريقيا، مشاو دارو هاد العشية أول حصة تدريبية فواحد التيران فبريطوريا، وركز فيها المدرب عادل رمزي والطاقم التقني ديالو على أنهم يحيدو العيا من اللاعبين ويرجعو لافريشور فيزيك ويخليوهم يولفو الجو، وكانت الأجواء حماسية وزوينة وسط الكروب.
ورجعو اللاعبين للفندق باش يتعشاو ويرتاحو، وغدا يبداو يركزو كثر على الفينال، في انتظار يديرو حصة تدريبية غدا العشية باش يدربهم عادل رمزي على الأسلوب اللي غيلعبو به مع صن داونز، وبعدها حصة أخيرة قبل الماتش غتكون السبت وكتكون خفيفة، وفيها آخر اللمسات استعدادا للفينال يوم الاحد الجاي.