"عندي كونصير وكنموت ودرت 7 آلاف عملية".. الممثلة المصرية نجوى إبراهيم تفركعات على المنتقدين ديالها

تفركعات الممثلة المصرية المخضرمة نجوى إبراهيم على المنتقدين ديالها لي لاصقين فيها فالسوشل ميديا، وقالت ليهم بأنها غادي تعتازل قريبا باش يبقاو على خاطرهم.
الممثلة المصرية المعروفة كانت ضيفة على برنامج إذاعي مصري، ومزكلاتش المناسبة باش تفركع على الناس لي كيتنمرو عليها على السوشل ميديا وكيطالبوها بالاستقالة حينت كبرات فالعمر.
ولكن الطريقة لي ردات بيها نجوى إبراهيم بقدر ما فيها من الغضب بقدر ما كانت مؤثرة حينت قالت بأنها فيها بزاف ديال السرطانات وكتموت.
وقالت الممثلة المصرية: "علاش بغيتوني نعتازل، باش نبقا مقابلاكم؟ إيه عندي 80 عام، وعندي بزاف ديال السرطانات ودرت شي 7 آلاف عملية".
هاد التصريح دار ضجة كبيرة في مصر، وخرج بزاف ديال الصحافيين والفنانين يعبرو على التضامن ديالهم مع الفنانة.