ها شكون الموظفين اللي تعتاقلو فريزو تهريب الحشيش بأسفي... ومصدر: حتى الفرقة الوطنية دالجندارم فتحت أونكيط

تفاصيل جديد جابتها "كود" على الريزو لي طيحو التنسيق الأمني بين الفرقة الوطنية ديال البوليس ومصالح الأمن الإقليمي بمدينة آسفي ومصالح المديرية العامة لمراقبة التراب الوطني، ولي تشدو فيه 6 د الأشخاص وتحجزات فيه سيارة هازة طنين و100 كيلوغرام من مخدر "الشيرا" بالميناء البحري لمدينة آسفي.
وفي هذا السياق، كشف مصدر "كود" أن هذا 6 د الأشخاص لتشدو في هاد العملية ومن بينهم موظفين عمومين وكيتعلق الأمر بدركي يشتغل بالمركز البحري لي ميناء آسفي وبوليسي بالميناء بالإضافة إلى 4 أشخاص الآخرين .
المصدر ذاته، قال إن عناصر الفرقة الوطنية للأبحاث القضائية التابعة لجهاز الجندارم تا هي دخلات على الخط او جا فريق منها البارح باش يتبع تراجي ديال السيارة لي كانت هازة السلعة، منين جات اومنين دازت، بحيت يضيف المصدر نفسه، أن عناصر الفرقة الوطنية للأبحاث القضائية ديال الجندارم بداو يقراو الكاميرات او متبعين آثار السيارة .
وقال المصدر نفسو، بللي حادث اعتقال أمنين في هاد الشبكة ديال الاتجار الدولي في الحشيش استنفر جميع الأجهزة الأمنية لي فتحات أونكيط باش تعرف المهمة ديال الأمنيين المشتبه في تورطهم مع هاد الشبكة.