الوداد خسرو لقب السوبر ليك: صن داونز كانو الأقوى ربحور لاكوب واستافدو من غياب جبران ووسط تيران الحمرا التالف

خسر الوداد الرياضي لقب السوبر ليك الإفريقي، بعدما انهزم اليوم الاحد فبريطوريا بجنوب إفريقيا، أمام ماميلودي صن داونز الجنوب إفريقي.
وسالا الماتش بين الوداد الرياضي وماميلودي صن داونز الجنوب إفريقي لمصلحة الأخير بنتيجة 2 لزيزو، ماركاهم له كل من شالولي فالشوط الأول وموديبا فالشوط الثاني، والهدفين بجوج جاو بأخطأ فالتغطية وسوء التمرير وقلة التركيز.
الماتش كان صعيب بزاف على الوداد ووسط تيران الحمرا ما كانش فالمستوى واخا المجهودات اللي دار المدرب عادل رمزي، ولكن ما قدرش يواجه قوة الجنوب إفريقيين بقيادة المدرب ماكوينا.
وبهذه الخسارة، كيكون الوداد الرياضي خسر لقب النسخة الأولى من مسابقة السوبر ليك الإفريقي، وربحو ماميلودي صن داونز، حيث مجموع ماتش الذهاب والإياب لمصلحتهم بنتيجة 3 لجوج، وراه ماتش الذهاب سالا للوداد فالمغرب بجوج لواحد.