لاعبين الوداد واجدين للترجي.. دارو آخر التداريب مع رمزي وسط أجواء حماسية وتركيز كبير وعينهم على الرباح

سالاو الوداد الرياضي الاستعدادات ديالهم لمواجهة الترجي التونسي فقمة افريقية عربية، غدا الاحد فمركب محمد الخامس بالدار البيضاء، ضمن ذهاب السوبر ليك الأفريقي.
ودارو الوداد الرياضي حصة تدريبية هاد العشية فتيران بنجلون فمدينة الدار البيضاء، هي الأخيرة للفريق قبل ماتش الترجي، وكانت الاجواء فيها حماسية وخدم فيها المدرب عادل رمزي على اللاعبين ديالو والطاقم التقني الخطة اللي غيلعبو بها ضد الفريق التونسي تقنيا وتكتيكيا، وسط واحد الجو ديال التركيز طالع، ودارو آخر الرتوشات قبل الماتش.
فالحصة التدريبية ديال الوداد الرياضي اللي حضرها موقع "كود"، بانو لاعبين الواك واجدين بدنيا للماتش، وحتى ذهنيا كيبانو بخير وعارفين كيفاش يتحكمو فالأعصاب ديالهم وفالضغط اللي كيسبق ديما بحال هاد الماتشات، وكانوا كيضحكو وناشطين.
وغيلعبو الوداد الرياضي غدا الاحد فستاد دونور مع الترجي التونسي ماتش ذهاب السوبر ليك الإفريقي، وغيبداو مع 7 الليل، ومن المنتظر يعرف اللقاء حضور جماهيري كبير للوداديين اللي باغيين يشجعوا فريقهم باش يربح الفريق التونسي ويسهل ماتش الروتور فتونس ويتأهل لفينال السوبر ليك الإفريقي.