الوداد ربحو إنييمبا فماتش دارو فيه كلشي: ماركاو أول هدف فالسوبر ليك وزكلو كفة دلبيوتا وتضامنو مع فلسطين

جابو الوداد الرياضي رباح مهم من نيجيريا، بعدما فازو على إنييمبا النيجيري اليوم الاحد، ضمن ذهاب ربع نهائي السوبر ليك الإفريقي.
وسالا الماتش بين الوداد وإنييمبا سالا بواحد لزيرو، وكانوا الوداد يقدرو يماركيو كثر من هدف فالمواجهة، حيث هما اللي كانوا الأكثر احتكار للكورة وتحكمو فالريتم ديال الماتش، ولكن ضيعو بزاف فرص التسجيل بسبب قلة التركيز والتسرع، مع العلم أن الفريق النيجيري ما قدرش يواكب ريتم الواك، وكملو الماتش بنقص عددي بعد طرد لاعب ديالهم اللي كان آخر مدافع كيطيح لاعب الوداد منتصر الحتيمي.
هدف رباح الوداد قدرو يجيبوه من بيلانتي بواسطة أيوب العملودي اللي خرج من وسط مدافعين إنييمبا ولقى راسو فاص أفاص مع لكول بعد تمريرة من حمدو الهوني، والكارديان ديال إنييمبا ما كانش عندو حل من غير يطيحو، والحكم سفر بيلانتي فالبلاصة حولو الكابيتان يحيى جبران فالدقيقة 39، إلى هدف أول للواك فالماتش وفالسوبر ليك الافريقي.
واستغلو لاعبين الوداد الرياضي الهدف اللي ماركاوه إنييمبا، وبينو خلال الاحتفال ديالهم به تضامنهم مع ضحايا الصراع الفلسطيني الإسرائيلي فغزة.
وغيرجعو الوداد الرياضي مباشرة بعد الماتش إلى المغرب فطيارة خاصة، ومن المنتظر يكونو غدا الاثنين فكازا باش يبداو يوجدو لماتش الروتور يوم الأربعاء الجاي، اللي غيبغيو يكونو مزيانين فيه فدونور لحسم التأهل إلى الدومي فينال.