كيدير راسو جاتو سكتة قلبية.. نصاب كيعركَها في مطاعم الصبليون وكيعلق بلاما يخلص

البوليس في الصبليون شدو واحد النصاب متخصص في التحايل على المطاعم، بعدما كيدخل كيعركَها وكيدير راسو جاتو سكتة قلبية.
على حساب بزاف د الصحف الصبليونية، هاد خونا لي عندو الجنسية الليتوانية، وعندو 50 عام دار هاد الحيلة ديالو على 50 ريسطو، قبل مايعيق بيه واحد.
لي عاق بيه هو واحد السرباي خدام فواحد الريسطو كيدير المأكولات البحرية سميتو El Buen Comer بعدما حصلو باغي يسلت وميخلصش تقريبا شي 400 درهم.
السرباي رجعو من حدا الباب وفين دار صاحبنا راسو نسا البزاط دار موتا حمارة، زعما جاتني سكتة قلبية، ولكن السرباي طلع طولانطي عليه، عاق بيه وهو يعيط للبوليس.
ومللي حققو معاه البوليس، لقاو بأنه دار هاد القالب ل20 ريسطو آخر، ودابا مهدد بعامين د الحبس، بتهمة النصب والاحتيال.