طلب الدولي المغربي أشرف حكيمي المسامحة هو واللاعبين الثلاثة صحابو فباريس سان جيرمان الفرنسيين عثمان ديمبيلي، وكولو مواني، ولايفين كورزاوا من جماهير أولمبيك مارسليا، حيث عيروهم بواحد الأغنية ديال جماهير psg ملي سالا الكلاسيكو بين الفريقين الويكاند اللي فات ضمن البطولة الفرنسية. وخرج كل من أشرف حكيمي وصحابو فباريس سان جيرمان عثمان ديمبيلي، وكولو مواني، ولايفين كورزاوا على الحسابات ديالهم بمواقع التوصل الاجتماعي، وقدمو اعتذار بسبب الكلمات المسيئة اللي كانوا كيغنيو تجاه جماهير أولمبيك مارسليا وهما فرحانين مع جماهير psg حيث ربحو الكلاسيكو 4 لزيرو ووضحو أنهم ما كانوش ناويين ولكن حماس الرباح خلاهم يفوتو القياس فالاحتفال وما يحسوش، وطلبو المسامحة، خصوصا وأنهم خاصهم يكونو قدوة للأطفال الصغار والشباب وتعهدو باش هادا الشي ما يبقاش يتعاود. وكانت لجنة الانضباط فرابطة البطولة الفرنسية لكرة القدم، صيفطت استدعاء للاعبين باريس سان جيرمان، النجم المغربي أشرف حكيمي والفرنسيين عثمان ديمبيلي، وكولو مواني، ولايفين كورزاوا، للمثول قدامها بسبب الأغاني اللي غناو ضد أولمبيك مارسيليا واللي فيها كلمات وعبارات مهينة. وحددت اللجنة يوم 5 أكتوبر مع 6 العشية، كتاريخ وموعد باش يدوزو عندها اللاعبين بربعة، وأكدت أن قرار استدعاؤهم جا بعدما توصلت بتقرير ديال مندوب الماتش، اللي دون أن اللاعبين صدرت منهم عبارات مهينة بعدما سالا الماتش ملي كانوا كيحتفلو بالرباح مع جمهورهم. وكانوا اللاعبين ديال باريس سان جيرمان بربعة بانوا ففيديو كيغنيو مع جمهور PSG، ملي سالا الماتش شي أغنية كيكلاشيو بها أولمبيك مارسيليا، وهي أغنية شابعة معيار وسبان فمارسيليا والجمهور ديالها، ونعتوهم ب"ولاد العاهرات".
