عادل رمزي: الرباح على المحمدية مهم بزاف.. الوداد كيتحسن خاصنا نخدمو على الدفاع كثر والناصيري موفر ليا كلشي

أكد عادل رمزي مدرب الوداد الرياضي أن الفريق كان محتاج للرباح اللي حقق على شباب المحمدية البارح الاحد، بنتيجة 3 لجوج، ضمن الدورة 2 من منافسات البطولة الاحترافية لكرة القدم.
وتحدث عادل رمزي بعد نهاية الماتش بين الوداد الرياضي وشباب المحمدية، وقال: "كنا محتاجين لهاد 3 النقاط وهذه هي أهم حاجة، وخصوصا أننا فريق كبير بالمغرب وجمهورنا كيبغينا ديما نربحو ومن حقو، وكنا محتاجين نفوتو هذه العقبة".
وكمل رمزي وقال: "اليوم طريقة اللعب ديالنا والكرة عندنا كانت أحسن من ماتش الفتح، ولكن دفاعيا خاصنا نتحسنو كثر حيث باش نكونو واقعيين ونافسو على الألقاب مع فرق عندهم إمكانيات كبيرة، خاصنا نكونو أكثر تركيز، حيث كنعطيو الكدوات فالوقت اللي خاصنا نماركيو ونسدو".
وشدد عادل رمزي: "عندنا عمل كثير ولكن كاين احسن وأنا مرتاح للعرض اللي قدموه اللاعبين حيث ماشي صعيب تماركي 2 أهداف ويتماركاو عليك 2 أهداف وترجع فالشوط الثاني، وبالنسبة لينا النتيجة هي أهم حاجة".
وختم عادل رمزي: "سعيد الناصيري عندي معه اتصال يومي وكيوفر ليا كاع داكشي اللي بغيت، الكروب اللي عندنا قوي وكيتقوى، وخاص غير النتائج وأنا عندي الثقة أنه الطريقة ديال اللعب بغيت نتحسنو فيها كل يوم وكنتمناو النتائج يكونو معنا حيث هي اللي كتعطي الثقة".