عبر عادل رمزي مدرب الوداد الرياضي على الأسف ديالو حيث خسر أول ماتش له مع الفريق فهاد الموسم، بالهزيمة مع الفتح الرياضي البارح الخميس فستاد دونو برسم الدور 1 من البطولة الاحترافية لكرة القدم بجوج لزيرو، وأكد أن الفريق خاصو يزيد يتقوى بلاعبين آخرين باش يقدر ينافس على الألقاب. وتحدث عادل رمزي، خلال الندوة الصحافية بعدما سالا الماتش بين الوداد والفتح وقال: "كنا كنتمناو نربحو خصوصا الماتش الأول فالموسم وكنعرفو أنها مهمة بزاف وفالملعب ديالنا وتبغي تبدا بداية مزيانة، ولكن البداية المزيانة بالنسبة ليا أنا ماشي هي النتيجة، بيانسير النتيجة مهمة ولكن كنشوف الحوايج اللي خدمنا وطلبتهم من الفريق ديالي اللي غيوصلونا للنتائج المزيانة وغيوصلونا للهدف ديالنا واش تطبقو". وكمل رمزي وقال: "بالنسبة ليا لا دفاعيا ولا هجوميا التنظيم كنا فيه مزيانين كانت هفوات ولكن غنصلحوهم مع الوقت ولكن لوركانيزاسيون كانت مزيانة، الفتح ماشي فريق اللي صغير عندهم التجربة ديالهم، و2 ديال الفرص تماركاو علينا وهذا هو الفوت بول وخاصنا نتقبلو هذا الشي، الفتح طبقو لوركانيزاسيون ديالهم مزيان وكيستاهلو مبروك عليهم". وما حملش رمزي الخسران ولكن عجبوه اللاعبين ديالز وقال: "ضراتني أنه ما ربحناش ولكن من الداخل ديالي أنا راضي على العرض اللي قدموه اللاعبين، وكنتمناو فالمستقبل العاجل أننا نحاولو بالطريقة والنتيجة بجوج وحنا باقيين فالتطور وخاصنا نديرو مجهود كثر". وأكد عادل رمزي أن الوداد مازال محتاج الانتدابات وقال: "وبخصوص الخصاص، دابا كاينة مجموعة من اللاعبين وما كنكذبش وما كنجاملش عندي فيهم الثقة إلا أنه ملي كنقول عندنا خصاص فالدفاع والهجوم راه هذاكشي خاص وقلناه ولكن كاينين شي ظروف اللي خاصنا نتقبلوهم، حيث اذا نتكلمو على مهاجم، عندنا مهاجم اللي هو هداف الموسم الماضي اللي مازال الوضع ديالو ما هو مع الفريق ماهو مشى منو، ومسألة 5 اللاعبين أجانب فقط اللي خاصهم يكونو مع الفريق، وراه متافق أنه إلى بغينا نافسو على الألقاب راه خاص المجموعة تتقوى كثر".
