مدرب البرتغال: كريستيانو تقلق حيث كان احتياطي ضد سويسرا وها شنو وقع معه

أكد فيرناندو سانتوس مدرب منتخب البرتغال خصم المنتخب الوطني المغربي فربع نهائي كاس العالم قطر 2022، أن كريستيانو رونالدو ما عجبوش الحال ملي ما شاركش ضد سويسرا فثمن نهائي المونديال ولكن ما هدددش بالرحيل عن المنتخب.
وقال فيرناندو سانتوس مدرب منتخب البرتغال فالندوة الصحافية اللي كتسبق ماتش المغرب ومنتخب بلادو: "أنا ورونالدو تكلمنا وهو الكابيتان ديال المنتخب البرتغالي وكيمثل شي حاجة كبيرة للبرتغاليين سوا بالنسبة الفريق الوطني أو بالنسبة للشعب".
وكشف مدرب البرتغال وقال: "تكلمت مع كريستيانو نهار ماتش سويسرا قبل لغدا وشرحت له الأسباب اللي خلاتني ما نلعبوش رسمي فهداك الماتش، باش ما يتفاجأش وفهمتو بلي هادي استراتيجية وخطة ديالنا فهاد الماتش والمهم فيها هو أنه ما يكونش لاعب فالبدية ديال الماتش".
وكمل فيرناندو سانتوس لكلام ديالو وقال: "كنا كنتوقعو أن الماتش ضد سويسرا غادي يكون صعيب بزاف وأنا بغيت نخليه حتى للشوط الثاني وهادشي اللي كان فالجولة الثانية، وطبعا رونالدو ما كانش عاجبو الحال حيث ديما وهو لعاب أساسي، وسولني واش هاد الفكرة عندك مزيانة، وشرحت له وجهت النظر ديالي وهو تقبلها وما قالش ليا باغي يرحل على المنتخب".